Woh Aakhri Chand Din December Ke - Nazm

::: Amjad Islam Amjad :::

woh aakhri chand din decemeber ke
har baras hi giran guzarte hain
khawahishon ke nigaar khanaay se
kaisay kaisay guman guzarte hain

raftagan ke bikhare saayon ki
aik mehfhil si dil mein sajti hai

phone ki diary ke safhon se
kitney number pkarte hain mujhe
jin se marboot be nawa ghanti
ab faqat mere dil mein bajti hai

kis qader payarey payarey naamon par
rengti badnuma lakerain si
meri aankhon mein phail jati hain
dooria dairay banati hain

naam jo kat gay hain unn ke harf
aisay kaghaz pay phail jatay hain

haadsay ke maqam par jaisay
khoon ke sokhey nshanon par
chaak se laine lagatay hain

phir decemeber ke aakhri din hain
har baras ki terhan se ab ke bhi
diary aik sawal karti hai

kya khabar is baras ke aakhir taq
mere un be chairag safhon se
kitney hi naam kat gay hunge
kitney number bikhar ke rustoon mein
gard e maazi se att gay hunge
khaak ki dheiron ke daman mein
kitney tufaan simat gay hunge

har decemeber mein sochta hon mein
ik din is terhan bhi hona hai
rang ko roshni mein khona hai

apne apne gharon mein rakhi hui
diary dost dekhte hunge

unn ki aankhon ke khawab dinon mein
aik sehraa sa phialta hoga
aur kuch be nisha safhon se
naam mera bhi kat gaya hoga.