Wo Lamha Mere Liye Kis Qadar Azab Ka Tha

::: Rahman Khawar :::

wo lamha mere liye kis qadar azab ka tha
haqiqaton pe guman jab khayal-o-khwab ka tha

tamam-umr hum apni ana mein mast rahe
wo nashsha sab se alag tha jo is sharab mein tha

kahan gae mere mausam wo aarzuon ke
kahan gaya jo zamana mere shabab ka tha

mita diye the sabhi harf gham ki barish ne
ajib haal meri zist ki kitab ka tha

jala na tha mere ghar mein koi diya jab tak
kahan ye rang hawaon ke pech-o-tab ka tha

hue buland kuchh itne ki hosh hi na raha
wo tha zamin ka manzar ki mahtab ka tha

udi hai aaj bahut khak us jagah "khawar"
hara-bhara koi pauda jahan gulab ka tha